Breaking News



பொத்துவில் தொடக்கம் பொலிகண்டி வரை மக்கள் எழுச்சிப் பேரணியில் கலந்துகொண்ட அரசியல் பிரதிநிதிகளுக்கு எதிராக நீதிமன்ற அவமதிப்பு குற்றச்சாட்டின் கீழ் பருத்தித்துறை நீதிமன்றில் 3 பொலிஸ் நிலையங்களால் பி அறிக்கைகள் தாக்கல் செய்யப்பட்டுள்ளன.

ஏற்கனவே பேரணிக்கு தடைகோரி ஏ அறிக்கையூடாக பருத்தித்துறை, நெல்லியடி மற்றும் வல்வெட்டித்துறை பொலிஸ் நிலையங்களால் தொடரப்பட்ட வழக்கிற்கு நீதிமன்று வழங்கிய தடை உத்தரவு மீறப்பட்டுள்ளதாகத் தெரிவித்தே, இந்த “பி” அறிக்கைகள் பேரணியில் கலந்துகொண்ட பாராளுமன்ற உறுப்பினர்கள் உள்ளிட்ட அரசியல் பிரதிநிதிகளுக்கு எதிராக தாக்கல் செய்யப்பட்டுள்ளன.

நீதிமன்றக் கட்டளைச் சட்டம் 55 (1), 56 2 (ஆ) ஆகிய பிரிவுகளின் கீழ் இந்த பி அறிக்கைகளை பருத்தித்துறை, நெல்லியடி மற்றும் வல்வெட்டித்துறை பொலிஸார் தனித்தனியே தாக்கல் செய்துள்ளனர்.

பருத்தித்துறை பொலிசார் தாக்கல் செய்த மனு மார்ச் 23ஆம் திகதிக்கு ஒத்திவைக்கப்பட்டுள்ளது.

நெல்லியடி, வல்வெட்டித்துறை பொலிசாரின் மனு 5ஆம் மாதத்திற்கு ஒத்தவைக்கப்பட்டுள்ளது.

பாராளுமன்ற உறுப்பினர்கள் தமிழ் அரசு கட்சியின் தலைவர் த.சித்தார்த்தன், எம்.ஏ.சுமந்திரன், இரா.சாணக்கியன், யாழ்ப்பாணம் மாநகர முதல்வர் வி.மணிவண்ணன், சட்டத்தரணி கே.சுகாஷ், முன்னாள் மாகாண சபை உறுப்பினர் எம்.கே.சிவாஜிலிங்கம் உள்ளிட்ட பிரதிநிதிகளுக்கு எதிராகவே இந்தக் குற்றச்சாட்டு முன்வைக்கப்பட்டுள்ளது.

இன்னும் பல பிரமுகர்களிற்கு வழக்கு தாக்கல் செய்யப்பட்டுள்ள போதும், அந்த விபரத்தை இதுவரை பொலிசார் வெளியிடவில்லை.

வாகன இலக்கத்தின் அடிப்படையில் நபர்களை அடையாளம் காணும் பணி நடந்து வருவதாக பொலிசார் தெரிவித்துள்ளனர்.

No comments

Note: Only a member of this blog may post a comment.