Breaking News


இலங்கை தமிழ் அரசுக்கட்சிக்குள் நீண்ட நாட்களாக நிலவிய குழு மோதல்கள் முடிவுக்கு வரும் அறிகுறிகள் தென்படுகிறது. குழு மோதல்களை முடிவுக்கு கொண்டு வர, மாவை- சுமந்திரன் மோதலை தீர்த்து வைக்க இன்று மேற்கொள்ளப்பட்ட முயற்சி ஓரளவு பலனை கொடுத்துள்ளதை போலவே தெரிகிறது.

இலங்கை தமிழ் அரசு கட்சியின் அரசியல்குழு கூட்டம் இன்று மாலை வவுனியாவில் இடம்பெற்றது.

இதில் இரா.சம்பந்தன், முன்னாள் செயலாளர் கி.துரைராசசிங்கம், எக்ஸ்.குலநாயகம் உள்ளிட்ட நான்கு பேர் சமூகமளிக்கவில்லை.

இன்றை கூட்டத்தில் பல விடயங்கள் ஆராயப்பட்ட போதும், முக்கியமாக மாவை- சுமந்திரன் மோதலை முடிவுக்கு கொண்டு வரும் நோக்கத்துடனேயே கூட்டப்பட்டதை போல தெரிந்தது.

கடந்த தேர்தலுடன் எம்.ஏ.சுமந்திரன் தரப்புடன் செயற்பட்ட சி.சிறிதரன் இந்த முயற்சியை ஆரம்பித்தார். அனேகமாக, சிறிதரன் பேசிய சந்தர்ப்பங்களில் எம்.ஏ.சுமந்திரன் பேசவில்லை. சுமந்திரன் தரப்பின் பிழைகள் என்றும் சிலவற்றை சிறிதரன் சுட்டிக்காட்டினார். அப்போதும் சுமந்திரன் பேசவில்லை. சுமந்திரன் தரப்பு குரலாக சிறிதரன் பேசியதாக ஊகிக்க முடிந்ததாக, கூட்டத்தில் கலந்து கொண்ட ஒன்றிற்கு மேற்பட்டவர்கள் குறிப்பிட்டனர்.

இரண்டு தரப்பின் மோதல் பின்னணிக் காரணங்களை சிறிதரன் குறிப்பிட்டார். தலைமைக்கு எதிரான, விமர்சன கருத்துக்களை சுமந்திரன் பகிரங்கமாக பேசியது தவறு, அதேபோல தலைமையும் சில விடயங்களை கட்சிக்குள் ஆலோசித்து செயற்பட்டிருக்க வேண்டுமென்றார்.

அத்துடன், தானும் ஒரு தவறு செய்துவிட்டதாக சிறிதரன் தெரிவித்தார். கட்சி தலைமையை ஏற்றுக்கொள்ள தயாராக இருப்பதாக பகிரங்கமாக கூறியது தவறானதுதான் என்பதை ஏற்றுக்கொள்கிறேன் என்றார்.

உள்கட்சி மோதல்களை முடித்து, ஓற்றுமையாக எதிர்வரும் காலங்களில் செயற்படுவதென்றும் கருத்துக்களை தெரிவித்தனர்.

மோதலை முடிவுக்கு கொண்டு வரும் இன்னொரு அஸ்திரத்தையும் சிறிதரன் வீசினார். எதிர்வரும் வட மாகாணசபை தேர்தலில் முதலமைச்சர் வேட்பாளராக மாவை சேனாதிராசாவை களமிறக்குவதென்றும், அவரை வெற்றியடைய தாம் அனைவரும் முழு முயற்சி செய்வோம் என்றும் தெரிவித்தார்.

இதையும் சுமந்திரன் ஆட்சேபிக்கவில்லை.

சிறிதரனின் கருத்தை சீ.வீ.கே.சிவஞானம் வழிமொழிந்தார்.

மாவை சேனாதிராசா தேர்தலில் போட்டியிடா விட்டால் நான் போட்டியிடுவேன் என கூறியிருந்தேன். ஆனால், மாவை சேனாதிராசாதான் வேட்பாளர் என்பதை நானே ஆரம்பத்திலிருந்து பிரேரித்து வருகிறேன். அவர் போட்டியிட்டால் அதை முழுமையாக ஆதரிப்பேன். அவரே வேட்பாளர் என்பதை நானும் ஆதரிக்கிறேன் என்றார்.

யாரும் அதை எதிர்க்கவில்லை.

அத்துடன், ஜெனீவா விவகாரம், சிவில் சமூகமென்ற பெயரில் விடுக்கப்பட்ட போராட்ட அறிவிப்பு பற்றியும் கலந்துரையாடப்பட்டது.

கட்சியின் மத்தியகுழு கூட்டத்தை அடுத்த மாத இறுதிக்குள் கூட்டுவதென்றும் தீர்மானிக்கப்பட்டது.

No comments

Note: Only a member of this blog may post a comment.