நீங்கள் முகநூல் மூலமாக எமது தளத்துக்கு வருபவராக இருந்தால் முகநூல் தடைப்பட்டால் செய்திகளை அறிய முடியாது இருக்கும் ஆகவே தயவு செய்து எமது onlinejaffna.com என்ற முகவரியை சேமித்து வைத்து அதன் மூலம் செய்திகளை நேரடியாக பார்வையிடுங்கள்!

Tuesday, May 21, 2019

யாழ்ப்பாணம் கொண்டுவரப்பட்ட ஆப்கான் அகதிகள் மீளவும் வவுனியா அனுப்பிவைக்கப்பட்டனர்!

Tuesday, May 21, 2019
Tags


வவுனியாவிலிருந்து யாழ்ப்பாணத்துக்கு அழைத்துச்செல்லப்பட்டிருந்த ஆப்கானிஸ்தான் அகதிகள் 6 பேர் மீண்டும் வவுனியாவுக்கு அனுப்பி வைக்கப்பட்டுள்ளனர்.

நீர்கொழும்பில் தஞ்சமடைந்திருந்த இவர்கள் கடந்த மாதம் 21 ஆம் திகதி நடத்தப்பட்ட பயங்கரவாத தாக்குதலின் பின்னர் அங்கு தங்கியிருப்பதற்கு அச்சமான சூழல் ஏற்பட்டது.

இந்நிலையில், அவ்வாறு தங்கியிருந்த 35 பேர் வவுனியா – பூந்தோட்டம் முகாமுக்கு கடந்த 18 ஆம் திகதி அனுப்பி வைக்கப்பட்டனர்.

பாகிஸ்தானை சேர்ந்த 19 பேரும் ஆப்கானிஸ்தானை சேர்ந்த 16 பேருமே பூந்தோட்டம் முகாமில் தங்கவைக்கப்பட்டனர்.

வவுனியா முகாமில் தங்கவைக்கப்பட்ட ஆப்கானிஸ்தான் குடும்பமொன்று நேற்று முன்தினம் (19) யாழ்ப்பாணத்துக்கு அழைத்துச் செல்லப்பட்டிருந்தது.

இவர்களை தேசிய தேர்தல்கள் ஆணைக்குழுவின் உறுப்பினர் ரட்ணஜீவன் ஹூல் பொறுப்பேற்றிருந்தார்.

இந்த நிலையில், ஒரே குடும்பத்தைச் சேர்ந்த ஆப்கான் அகதிகள் 6 பேரும் இன்று மீண்டும் வவுனியா பூந்தோட்டம் முகாமுக்கு அனுப்பி வைக்கப்பட்டுள்ளனர்.

இது தொடர்பில் கருத்து தெரிவித்த ரட்ணஜீவன் ஹூல்

இந்த அகதிகளை கொண்டுவந்தமை தொடர்பில் கடந்த ஞாயிற்றுக்கிழமை யாழ்ப்பாண பொலிஸ் நிலையத்தில் பதிவை மேற்கொண்டிருந்தோம்.எனினும் நேற்றுக்காலை பொலிஸ் நிலையம் வருமாறு அழைத்திருந்தனர்.அங்கு சென்றபோது சைவ தீவிரவாதிகள் அடிக்கப்போகிறார்கள் எமக்குப் பயமாக உள்ளது உடனே வெளியேறவேண்டும் என கூறினார்கள்.என்னைப் பொறுத்தவரை இது பொய்.இது தொடர்பாக சபா நாயகருடன் பேசினேன். அவர் யாழ்ப்பாண பொலிஸ் பொறுப்பதிகாரியுடன் பேசினார் எனினும் அவர் சொன்னார் எமக்கு பிரச்சனையில்லை் ஆளுநர் சுரேன் ராகவன்தான் அகதிகளை பூந்தோட்டம் முகாமுக்கு செல்லவேண்டும் என கூறினார் என்று.

எனினும் எனது வீட்டில் ஒருவரை வைத்திருப்பதற்கு எனக்கு முழுச்சுதந்திரம் உண்டு எனக் கூறியபோது பொலிஸ் பொறுப்பதிகாரி சபாநாயகருடன் நான் பேசியது தவறு எனத் தெரிவித்தார்.இது எனது அடிப்படை உரிமை. நான் எனது சட்டத்தரணிகளுடன் இது தொடர்பில் பேச எனக்கு ஒரு கால அவகாசம் வேண்டும் என கூறினேன். அதற்கு அவர் வெள்ளிக்கிழமை வரை கால அவகாசம் தருவதாக தெரிவித்தார்.

எனினும் இரவு 8 மணியளவில் பொலிஸ் ஜீப் எமது வீட்டு வாசலில் வந்து நின்றது. பின்னர் இரண்டு பொலிஸார் வீட்டுக்குள் வந்தனர்.இதன்போது அகதிகள் தமக்கு இங்கிருக்க பயமாக உள்ளதாகவும் தாம் போகப்போவதாகவும் தெரிவித்தனர்.

ஆளுநர் எமக்கு அளித்த உறுதிமொழியை மீறியுள்ளதோடு அவர் அந்த பதவியில் இருக்கவும் தகுதியற்றவர் எனத் தெரிவித்தார்.