Wednesday, February 6, 2019

துப்பாக்கிச் சூட்டில் கொல்லப்பட்ட யாழ்.மாணவர்கள் வழக்கு விசாரணையில் திடீர் மாற்றம்!

  admin       Wednesday, February 6, 2019


யாழ்ப்பாணப் பல்கலைக்கழக மாணவர்கள் இருவர் துப்பாக்கிச் சூட்டில் கொல்லப்பட்ட சம்பவம் தொடர்பான வழக்கின் விசாரணைகள் ஒத்திவைக்கப்பட்டுள்ளன.

குறித்த வழக்கின் மனு மீதான விசாரணைகள், யாழ்.நீதவான் அந்தோனி சாமி பீற்றர் போல் முன்னிலையில், நேற்று எடுத்துக்கொள்ளப்பட்டது.

இதன்போது சம்பவத்துடன் தொடர்புடைய சந்தேகநபர்கள் இருவரும் நீதிமன்றத்தில் முன்னிலையாகினர்.

அதேபோன்று குற்றப் புலனாய்வுத் திணைக்கள அதிகாரிகளும், வழக்குத் தொடுனர் தரப்பில் அரச சட்டத்தரணியும் முன்னிலையாகியிருந்தனர்.

இதன்போது, கொல்லப்பட்ட மாணவர்களின் நண்பர்கள் உள்ளிட்டோரிடம் சாட்சிகள் பெறப்பட்டதை தொடர்ந்து வழக்கு விசாரணைகளை எதிர்வரும் 27 ஆம் திகதிக்கு நீதிமன்றம் ஒத்திவைத்துள்ளது.

யாழ்ப்பாண பல்கலைக்கழகத்தில் கல்வி கற்றுவந்த மாணவர்களான விஜயகுமார் சுலக்சன், நடராஜா கஜன் ஆகியோர் கொக்குவில் குளப்பிட்டியில் கடந்த 2016 ஆம் ஆண்டு ஒக்டோபர் 20 ஆம் திகதி, பொலிஸாரின் துப்பாக்கிச் சூட்டில் கொல்லப்பட்டனர்.

குறித்த சம்பவம் குறித்து, யாழ்ப்பாணம் பொலிஸ் நிலையத்தில் பணியாற்றிய தமிழ் பொலிஸ் உத்தியோகத்தர் உட்பட 5 பொலிஸார் கைது செய்யப்பட்டு விளக்கமறியலில் வைக்கப்பட்டனர்.

ஆனால் 11 மாதங்கள் கடந்து, அவர்களை யாழ்ப்பாணம் மேல் நீதிமன்றம் பிணையில் விடுவித்தது. பின்னர் பொலிஸ் சேவையிலும் மீள இணைத்துக்கொள்ளப்பட்டனர்.

மேலும் வழக்கில் சந்தேகநபர்களாக குறிப்பிடப்பட்டிருந்த 5 சந்தேகநபர்களில் இரண்டாவது சந்தேகநபரான ஏக்கநாயக்க முதியான்சலாகே ஜயவர்த்தன, நான்காவது சந்தேகநபரான தங்கராஜன் லங்காமனன், ஐந்தாவது சந்தேகநபரான கமல விதானகே நவரத்ன பண்டார ஆகியோரை வழக்கிலிருந்து விடுவித்து அரச சாட்சிகளாக மாற்றப்பட்டனர்.

அதேபோன்ற கடமைக்கு பொறுப்பாகவிருந்தவரான முதலாவது சந்தேகநபரான சரத் பண்டார திசாநாயக்க மற்றும் சூடு நடத்தியவரான மூன்றாவது சந்தேகநபரான சமர ஆராய்சிலாகே சந்தன குமார சமர ஆராச்சி ஆகிய இருவருக்கும் எதிராக இலங்கை குற்றவியல் நடைமுறை சட்டக்கோவையின் 296 ஆம் பிரிவின் கீழான கொலைக் குற்றச்சாட்டின் கீழ் பிராது பத்திரத்தை குற்றப் புலனாய்வுப் பிரிவினர் நீதிமன்றில் தாக்கல் செய்திருந்தனர்.

குற்றப் புலனாய்வுப் பிரிவினரின் அறிக்கையை ஏற்றுக்கொண்ட யாழ்.நீதவான் நீதிமன்றம், விசாரணைகளைத் துரிதப்படுத்துமாறு உத்தரவிட்டது.

அதனடிப்படையில் இந்த வழக்கு நேற்று விசாரணைக்கு எடுத்துக்கொள்ளப்பட்டிருந்தமை குறிப்பிடத்தக்கது.

logoblog

Thanks for reading துப்பாக்கிச் சூட்டில் கொல்லப்பட்ட யாழ்.மாணவர்கள் வழக்கு விசாரணையில் திடீர் மாற்றம்!

Previous
« Prev Post