நீங்கள் முகநூல் மூலமாக எமது தளத்துக்கு வருபவராக இருந்தால் முகநூல் தடைப்பட்டால் செய்திகளை அறிய முடியாது இருக்கும் ஆகவே தயவு செய்து எமது onlinejaffna.com என்ற முகவரியை சேமித்து வைத்து அதன் மூலம் செய்திகளை நேரடியாக பார்வையிடுங்கள்!

Wednesday, June 26, 2019

உடனடியாக நிறுத்துக....! மைத்திரிக்கு விடுக்கப்பட்ட கடும் எச்சரிக்கை!!

Wednesday, June 26, 2019


சிறிலங்கா அரச தலைவர் மைத்திரிபால சிறிசேன தொடர்பில் சர்வதேச மன்னிப்புச் சபை அவசர வலியுறுத்தல் ஒன்றை முன்வைத்துள்ளதுடன் எச்சரிக்கையினையும் விடுத்துள்ளது.

அதன்படி போதைப்பொருள் குற்றவாளிகளுக்கு விதிக்கப்படுவதாக தீர்மானிக்கப்பட்டுள்ள மரண தண்டனைத் திட்டத்தை உடனடியாக நிறுத்த வேண்டும் என்று மேற்படி சபை வலியுறுத்தியுள்ளது.

குறைந்தபட்சம் 13 கைதிகளுக்கு மரண தண்டனை விதிப்பதற்கு தீர்மானிக்கப்பட்டுள்ளமை தெரியவருவதாக சுட்டிக்காட்டிய மன்னிப்புச் சபை இது இலங்கை தொடர்பில் சர்வதேச ரீதியான பாரதூரமிக்க விளைவுகளை ஏற்படுத்தும் என்றும் எச்சரித்துள்ளது.

இது தொடர்பாக தனது உத்தியோகபூர்வ இணையத்தளத்தின்வாயிலாக விசேட அறிக்கை ஒன்றை மன்னிப்புச் சபை வெளியிட்டுள்ளது.

அதில் மேலும் தெரிவிக்கப்பட்டுள்ளதாவது,

இம்மாதம் 21ஆம் திகதி முதல் ஜூலை 1ஆம் திகதிவரை 2019ஆம் ஆண்டிற்கான தேசிய போதைப்பொருள் ஒழிப்பு வாரம் பிரகடனப்படுத்தப்பட்டு அதில் ஒரு பகுதியாக மரண தண்டனைக் கைதிகளுக்கு மரணதண்டனை நிறைவேற்றுவதற்கான ஏற்பாடுகள் நடந்து வருவதாக ஊடக அறிக்கைகளிலிருந்து அறியமுடிகிறது.

இந்த மரணதண்டனைகளானது இலங்கை இறுதியாக 1976ஆம் ஆண்டு நடைமுறைப்படுத்திய மரணதண்டனைக்குப் பின்னரான முதலாவது தண்டனைகளாகும்.

சர்வதேச மன்னிப்புச் சபையின் தெற்காசியா இயக்குனர் பிராஜ் பட்நாயக் இதுகுறித்து கூறுகையில், “இந்த செய்தியை அறிந்து நாம் திகைத்துப்போயுள்ளோம். இது இலங்கையின் மரண தண்டனை தொடர்பான நேர்மறையான பதிவை சர்வதேச ரீதியில் பதியச்செய்யும். இந்த மரணதண்டனைகளானது இலங்கையை போதைப்பொருள் தொடர்பான குற்றத்திலிருந்து ஒருபோதுமே விடுவிக்காது. மாறாக ஒரு மனிதாபிமான சமுதாயத்தை உருவாக்கத் தவறியதையே அவை எடுத்துக்காட்டுகின்றன. இலங்கைக்கு இப்போது தேவைப்படும் கடைசி விஷயம் என்னவென்றால் பழிவாங்கல் என்ற பெயரில் ஏற்படுத்தப்படும் மரணம் தண்டனை தான் போலும்.” என்றார்.

சிறிலங்கா ஜனாதிபதியின் அலுவலகத்தால் இதுகுறித்த உத்தியோகபூர்வ அறிவிப்பு எதுவும் இதுவரை வெளியிடப்படவில்லை என்றாலும், புதிதாக ஆட்சேர்ப்பு செய்யப்பட்ட அலுக்கோசுகள் எனப்படும் தூக்குத் தண்டனை நிறைவேற்றாளர்களுக்கு பயிற்சி அளிக்கப்பட்டுள்ளதாகவும், தூக்கிலிடப்படுவதை மீண்டும் ஆரம்பிப்பதற்கு ஜனாதிபதி மைத்திரிபால சிறிசேன விருப்பம் கொண்டுள்ளதாகவும் பல ஆதாரங்கள் தமக்கு கிடைத்துள்ளதாக மன்னிப்புசபை கூறுகின்றது.

போதைப்பொருள் தொடர்பான குற்றங்களுக்கான மரணதண்டனைகள் சட்டவிரோதமானது என்று சுட்டிக்காட்டிய மன்னிப்புச் சபை, அந்த குற்றவாளிகள் மிகக் கடுமையான குற்றங்களுக்கான நுழைவாயிலைச் சந்திக்கவில்லை என்றும் கூறியுள்ளது.

இதேவேளை, திட்டமிடப்பட்டுள்ள மரணதண்டனைகள் எவ்வளவு என்பது குறித்த விவரங்கள், எத்தனை கைதிகள் மரணதண்டனை ஆபத்தில் உள்ளனர் என்பது குறித்த விபரங்கள் தெரியவில்லை என்றும் மன்னிப்புச்சபை கூறியுள்ளது.

இதன்படி, சிறிலங்கா அரசாங்கம் இந்த திட்டங்களை ரகசியமாக வைத்திருப்பதன் மூலம், மரண தண்டனையை எதிர்கொள்பவர்களின் உரிமைகளைப் பாதுகாப்பதற்காக சர்வதேச சமூகம் எடுக்கப்போகும் நடவடிக்கைகளை தடுக்கும் முயற்சியில் ஈடுபட்டுள்ளதாக மன்னிப்புச்சபை குற்றம் சுமத்தியுள்ளது.

"ஒரு மனித வாழ்க்கையை மேம்படுத்துவது ஒரு அரசாங்கம் செய்யக்கூடிய மிகப்பெரிய செயல்களில் ஒன்றாகும். தண்டனையின் தீவிரத்தன்மைக்கு முழுமையான வெளிப்படைத்தன்மை இருப்பதுதான் அதுகுறித்த சரியான செயல்முறையின் முக்கிய பாதுகாப்பாக விளங்கக்கூடியது ”என்றார் பீராஜ் பட்நாயக்.

தண்டனை குறித்த நியாயமான விசாரணைக்கான அனைத்து நடவடிக்கைகளும் சர்வதேச தரங்களுக்கு இணங்குவதை உறுதிசெய்வது அரசாங்கத்தின் கடமையாகும். இதில் கைதிகள் மேன்முறையீடு செய்வதற்கான உரிமையை மதித்தல், கருணை கோருதல், கைதிகளோ அல்லது அவர்களது குடும்பங்களோ மற்றும் சட்ட பிரதிநிதிகளோ தண்டனை குறித்த எந்தவொரு திட்டத்தையும் மேற்கொள்வதற்கு போதுமான அறிவிப்பு வழங்கப்படுவதை உறுதி செய்தல் அரசாங்கத்தின் கடமையாகும். இதுதான் மரண தண்டனை தொடர்பான நடைமுறையாகும். ஆனால் இதில் எந்த செயல்முறை பின்பற்றப்பட்டுள்ளது என்பது தொடர்பில் தெளிவா நிலைப்பாடு இலங்கையில் தற்போது இல்லை.

சர்வதேச மன்னிப்புச்சபையானது அனைத்து சூழ்நிலைகளிலும் மரண தண்டனையை முற்றிலும் எதிர்க்கிறது. மரண தண்டனையை முற்றிலுமாக ஒழிக்கும் நோக்கில், அதன் தற்போதைய மரணதண்டனைத் திட்டங்களை நிறுத்தி, மரண தண்டனைகளை அமல்படுத்துவது குறித்து உத்தியோகபூர்வ தடை விதிக்க வேண்டும் என்று நாம் இலங்கை அரசாங்கத்திடம் கோரிக்கை விடுக்கிறோம். என்று மன்னிப்புச்சபையின் அறிக்கையில் கூறப்பட்டுள்ளது.

முதன்முறையாக நீதிமன்றத்திற்கு அழைத்து வரப்பட்ட தீவிரவாதி ஸஹ்ரானின் மனைவி: பணக்கொடுக்கல் வாங்கல் பற்றி வெளியிட்ட ‘பகீர்’ தகவல்!

Wednesday, June 26, 2019


உயிர்த்த ஞாயிறு தாக்குதல் சூத்திரதாரி ஸஹ்ரான் ஹாஷிமின் மனைவி இன்று கல்முனை நீதிமன்றத்தில் முன்னிலைப்படுத்தப்பட்டார். அவரை தடுத்து வைத்து தொடர்ந்து விசாரணை செய்ய நீதிமன்றம் உத்தரவிட்டுள்ளதுடன், பணக்கொடுக்கல் வாங்கல் தொடர்பில் வாக்குமூலம் பெறவும் உத்தரவிடப்பட்டுள்ளது.

சம்மாந்துறையில் உள்ள சிலருடன் ஸஹ்ரானிற்கு பணக்கொடுக்கல் வாங்கல் இருந்ததாக அவர் விசாரணையில் தெரிவித்த தகவலின் அடிப்படையில், இன்று கல்முனை நீதிமன்றத்தில் முற்படுத்தப்பட்டார். அது தொடர்பில் விசாரணை நடத்த அனுமதி கோரப்பட்டிருந்தது.

அந்த விவகாரத்தில் வாக்குமூலம் பெற நீதிமன்றம் உத்தரவிட்டதையடுத்து, தற்போது கல்முனை பொலிஸ் நிலையத்தில் அவரிடம் வாக்குலம் பெறப்பட்டு வருகிறது.

பணக்கொடுக்கல் வாங்கல் செய்ததாக அவரால் குறிப்பிடப்பட்ட சாய்ந்தமருது பகுதி வீடுகளிற்கு சென்றபோது, அந்த வீடுகள் ஆட்களற்று இருந்துள்ளன என்று குறிப்பிடப்படுகிறது. அங்கிருந்தவர்கள் தலைமறைவாகியிருக்கலாமென கருதப்படுகிறது.

ஸஹ்ரானின் மகளும் உடன் வந்தார்.

மேலதிக தகவல்கள் பின்னர் பதிவிடப்படும்.



தமிழர்களிற்கு இப்போது கல்முனையை கொடுத்தால், நாளை ஜனாதிபதி, பிரதமர் பதவியையும் கேட்பார்கள்!

Wednesday, June 26, 2019


ஏப்ரல் குண்டுத்தாக்குதலை தொடர்ந்து முஸ்லிம் மக்கள் எதிர்கொள்ளும் பிரச்சனைகளை உள்ளடக்கிய 10 கோரிக்கைகளை முன்வைத்து முஸ்லிம் மக்களின் உரிமைகளை பாதுகாக்கும் அமைப்பினர் நேற்று செவ்வாய்க்கிழமை புதுக்கடை நீதிமன்றத்தின் அருகில் ஆர்ப்பாட்டத்தை மேற்கொண்டனர்.

இதன்போது கருத்து வெளியிடுகையிலேயே மில்ஹான் இவ்வாறு தெரிவித்தார்.

அவர் மேலும் தெரிவிக்கையில்,

ஏப்ரல் 21ம் திகதி அடிப்படைவாதிகளினால் நடத்தப்பட்ட தொடர் குண்டு தாக்குதல் வன்மையாக கண்டிக்கத்தக்கது. இத் தாக்குதல்தாரிகள் இறந்ததன் பின்னர் கூட அவர்கள் நல்நிலையினை அடையாத வகையில் முஸ்லிம் மக்கள் கடுமையாக செயற்பட்டனர். மையவாடிகளில் கூட தாக்குதல்தாரிகளின் உடல்களை அடக்கம் செய்ய விடவில்லை.

குண்டுத்தாக்குதலின் பின்னர் முஸ்லிம் மக்கள் உளவியல்ரீதியில் கடுமையாக பாதிக்கப்பட்டுள்ளனர். வன்முறைகள் கட்டவிழ்த்து விடப்பட்டுள்ளன. இதன் பின்னணியில் அரசியல்வாதிகள் உள்ளனர். கல்முனை வடக்கு பிரதேசசெயலகத்தை தரமுயர்த்துமாறு கோர வியாழேந்திரன், கருணா போராட்டத்தை முன்னெடுப்பது எதிர்காலத்தில் பெரும் விளைவுகளை ஏற்படுத்தும்.

விடுதலைப்புலிகளின் தலைவர் பிரபாகரன் அன்று ஆயுதமேந்தி போராடியதன் விளைவு பாரதூரைமாக அமைந்தது. இன்று அதன் தொடர்ச்சியாக தமிழ் அரசியல்வாதிகள், பௌத்த பிக்குகளுடன் இணைந்து போராட்டத்தை தொடர்கிறார்கள். கல்முனை வடக்கு பிரதேச செயலகத்தை தமிழ் மக்களின் கோரிக்கைகளுக்கு அமைய தற்போது தரமுயர்த்தினால், தமிழர்கள் நாளை நாட்டின் ஜனாதிபதி, பிரதமர் மற்றும் முக்கிய பதவிகளை கேட்டு போராடுவார்கள். இவற்றை நிறைவேற்ற நாட்டு மக்கள் ஒத்துழைப்பார்களா?“ என்றார்.


'இது ஒரு சாபக்கேடு' மீண்டும் கொழும்பை பரபரப்பில் ஆழ்த்திய மைத்திரி!

Wednesday, June 26, 2019


ஸ்ரீலங்காவில் நடைமுறையில் இருக்கும் 19ஆவது திருத்த சட்டமானது முழுமையாக அரச சார்பற்ற நிறுவனங்களுக்காக உருவாக்கப்பட்டது என ஜனாதிபதி மைத்திரிபால சிறிசேன குற்றம் சாட்டியுள்ளார்.

ஜனாதிபதி மாளிகையில் இன்று காலை ஊடக பிரதானிகள் மற்றும் ஊடகவியலாளர்களை சந்தித்த போது தெரிவித்துள்ளார்.

அத்துடன் 19 வது திருத்தம் நாட்டிற்கு ஒரு சாபக்கேடாகும் எனவும் அதிரடியாக தெரிவித்த ஜனாதிபதி, தற்போது நடைமுறையில் இருக்கும் 19 ஆவது திருத்தினை ஒழித்தால் 2020 ஆம் ஆண்டு செழிமையான நாடாக இலங்கை மாறும் என்றும் தெரிவித்துள்ளார். இந்த அரசியலமைப்பினால் தான் நாட்டில் அரசியல் ஸ்திரம் இல்லாமல் இருப்பதாகவும் அவர் தெரிவித்துள்ளார்.

மேலும் அடுத்த ஜனாதிபதித் தேர்தலில் வெற்றிபெற்று யார் ஆட்சிக்கு வந்தாலும், 19 ஆவது அரசியலமைப்பினை ஒழிக்க நடவடிக்கை எடுக்க வேண்டும் என்றும் இந்த சந்திப்பின் போது கோரிக்கை விடுத்தார்.

அடுத்த ஜனாதிபதித் தேர்தலில் போட்டியிடுவது தொடர்பாக சுதந்திர கட்சி எடுக்கும் எந்தவொரு முடிவையும் நான் பின்பற்றுவேன் என்றும் மைத்திரி தெரிவித்துள்ளார்.

மேற்படி ஜனாதிபதி மைத்திரிபால சிறிசேனவின் அதிரடிக் கருத்தினால் கொழும்பு அரசியலில் சற்று பரபரப்பு நிலை தோன்றியுள்ளதாக நோக்கர்கள் கூறியிருக்கின்றனர்.

நாட்டின் முக்கியமான சட்டத்தை சாபக்கேடு என கூறிய அவரது கருத்து அரசியலில் எத்தகைய தாக்கத்தைச் செலுத்தப்போகின்றது என்பதை அடுத்துவரும் நாட்களில் காணலாம் என கொழும்பு அரசியல் வட்டாரங்கள் கூறுகின்றன.

Tuesday, June 25, 2019

உயிர்த்தஞாயிறு தாக்குதலில் முக்கிய திருப்பம் - தேசிய தவ்ஹீத் ஜமா அத்தின் தலைவரை காட்டிக் கொடுத்த சகாக்கள்!

Tuesday, June 25, 2019


தம்புள்ளவில் உள்ள விடுதியொன்றில் இருந்து அண்மையில் கைது செய்யப்பட்ட சந்தேகநபர் நௌபர் மௌலவி தேசிய தவ்ஹீத் ஜமா அத்தின் (என்.டி.ஜே) அமைப்பின் தலைவரென பாதுகாப்புப் படையினர் அடையாளம் கண்டுள்ளனர் என பாதுகாப்பு வட்டாரங்கள் தெரிவித்துள்ளன.

தற்போது சிஐடி காவலில் உள்ள குறித்த சந்தேக நபரை ஈஸ்டர் ஞாயிறு சந்தேக நபர்களின் முன்பாக கொண்டுவந்து நிறுத்தியவேளைஅவர்களால் அடையாளம் காட்டப்பட்டார் எனத் தெரிவிக்கப்படுகிறது.

ஈஸ்டர் ஞாயிறு தாக்குதலுக்கு முன்னர் தேசிய தவ்ஹீத் ஜமா அத்தின் குழுவின் தலைவர்கள் நௌபருடன் ஒரு சந்திப்பை நடத்தியதாகவும், அந்தக் கூட்டத்தின் போது வேறு பல திட்டங்களும் முன்வைக்கப்பட்டதாகவும் கூறப்படுகிறது. எனினும், சஹ்ரான் ஹாஷிம் தான் தற்கொலைத் தாக்குதல்களை முன்மொழிந்தார்.

இந்த சந்திப்பில் இந்த தற்கொலைத் தாக்குதல்களை நடத்த தன்னுடன் இணையுமாறு பலரை அவர் கேட்டுக்கொண்டார்.

தற்போது காவலில் வைக்கப்பட்டுள்ள மௌலவியும் தேசிய தவ்ஹீத் ஜமா அத்தின் கருத்துக்களை பரப்புவதற்கு பொறுப்பான தலைவராக செயல்பட்டதாக தெரிவிக்கப்படுகிறது.

முஸ்லிம்களின் தலைநகர் கல்முனை -பாதுகாக்க அணிதிரள அழைப்பு!

Tuesday, June 25, 2019


முஸ்லிம்களின் தலைநகர் கல்முனை. அதனைப் பாதுகாக்க வேண்டியது இலங்கைவாழ் ஒவ்வொரு முஸ்லிம்களின் தலையாய கடமை என்கிறார் முஸ்லிம் காங்கிரஸின் உயர்பீட உறுப்பினர் ஏ.சி.யஹ்யாகான்.

ஊடகங்களுக்கு அனுப்பியுள்ள அறிக்கையிலேயே அவர் இவ்வாறு தெரிவித்துள்ளார்.அதில் மேலும் தெரிவிக்கப்பட்டுள்ளதாவது

“கல்முனை வடக்கு பிரதேசத்துக்கு செயலகம் அவசியம் என்று தமிழ் மக்கள் கருதினால் துறவிகளினதும் அரசியல்வாதிகளினதும் நிகழ்ச்சிநிரலுக்கு அடிபணிந்துவிடாது சிவில் சமூகத் தலைவர்கள் பேசி சிறந்த முடிவுக்கு வரமுடியும்.

எனினும் கல்முனை வடக்கு பிரதேச செயலகம் என்ற கோரிக்கையை முன்னிறுத்தி தமிழ்ச் சகோதரர்கள் முன்னெடுத்த போராட்டம் அவர்களுக்கான பிரதேச செயலகத்தைப் பெறுவது என்பதைவிட அடையாளமற்று இருந்த சில அரசியல்வாதிகள் தங்களது முகவரிகளைப் புதுப்பிக்கும் நிகழ்வாக அமைந்துவிட்டது.

மறுபுறம் கல்முனை விடயத்துக்குத் தீர்வு ஒன்றைப் பெற்றுக்கொடுக்கப் பல்வேறு எத்தனிப்புக்கள் எடுக்கப்படுகின்ற இந்தச் சந்தர்ப்பத்தில் முப்பது வருடங்களாக உள்ளூராட்சி சபைக் கோரிக்கையை முன்னிறுத்திப் போராடி வரும் சாய்ந்தமருது மக்களின் கோரிக்கையும் கிடப்பில் போடப்பட்டுள்ளது.

இந்த மக்களினது பிரச்சினையைத் தீர்ப்பதற்கும் பல்வேறு குழுக்கள் அமைக்கப்பட்டன. அவற்றுக்கும் என்ன நடந்தது என்று புரியவில்லை. அந்த மக்களின் கோரிக்கையும் சமாந்தரமாக தீர்க்கப்பட வேண்டும்” என்றார்.

றெக்சியன் கொலை வழக்கு: ஈ.பி.டி.பி கட்சியின் அப்போதைய யாழ் மாவட்ட அமைப்பாளர் கமல், அனிதாவிற்கு எதிராக குற்றப்பத்திரம் தாக்கல்!

Tuesday, June 25, 2019


நெடுந்தீவு பிரதேசசபையின் முன்னாள் தவிசாளர் டானியல் ரெக்சியன் (ரஜீவ்) கொலை வழக்கில் வடக்கு மாகாணசபையின் முன்னாள் எதிர்க்கட்சித் தலைவர் க.கமலேந்திரன் மற்றும் ரெக்சியனின் மனைவி அனிதா ஆகிய இருவருக்கும் எதிராக யாழ்ப்பாணம் மேல் நீதிமன்றில் குற்றப்பத்திரிகை தாக்கல் செய்யப்பட்டுள்ளது.

நீதிவான் நீதிமன்றில் சுருக்கமுறையற்ற விசாரணைகள் நிறைவடையாத சந்தர்ப்பத்தில், சட்ட மா அதிபர் தனக்கு இருக்கும் அதிகாரத்தின் கீழ் சந்தேகநபர்கள் இருவருக்கும் எதிராக கொலைக் குற்றச்சாடடை முன்வைத்து யாழ்ப்பாணம் மேல் நீதிமன்றில் நேரடியாக குற்றப்பத்திரிகையைத் தாக்கல் செய்துள்ளார்.

2013 ஆம் ஆண்டு நவம்பர் நவம்பர் 27 ஆம் திகதிக்கு அண்மித்த காலப்பகுதியில் யாழ்ப்பாணம் புங்குடுதீவு பிரதேசத்தில் டானியல் ரெக்சியன் கமலேந்திரன் என்பவரை கொலை செய்ததன் ஊடாக தண்டனைச் சட்ட நடவடிக்கைக் கோவை 296ஆம் பிரிவின் கீழ் தண்டிக்கப்படக் கூடிய குற்றத்தை புரிந்துள்ளதாக இருவருக்கு எதிராக சட்ட மா அதிபரால் இந்தக் குற்றப்பத்திரிகை தாக்கல் செய்யப்பட்டுள்ளது.
 
நெடுந்தீவு பிரதேச சபையின் தவிசாளரான டானியல் ரெக்சியன் 013ஆம் ஆண்டு நவம்பர் மாதம் படுகொலை செய்யப்பட்டார்.

இக்கொலை தொடர்பாக ஈ.பி.டி.பி கட்சியின் அப்போதைய யாழ் மாவட்ட அமைப்பாளரும், வடக்கு மாகாணசபையின் அப்போதைய எதிர்க்கட்சித் தலைவருமான கந்தசாமி கமலேந்திரன் (கமல்), ஒரு வாரத்தின் பின் கொழும்பில் வைத்து குற்ற புலனாய்வு பிரிவினால் கைது செய்யப்பட்டார்.

டானியல் ரெக்சியனுடைய மனைவி அனிதா மற்றும் வேலணையை சேர்ந்த இளைஞர் ஒருவரும் சந்தேகத்தின் அடிப்படையில் கைது செய்யப்பட்டனர்.

கமலேந்திரன் மற்றும் ரெக்சியனுடைய மனைவி ஆகிய இருவரும் கொலையுடன் நேரடியாகத் தொடர்புடையவர்கள் என்ற குற்றச்சாட்டின் அடிப்படையில் தடுத்து வைக்கப்பட்டனர். பின்னர் அவர்கள் இருவரும் யாழ்ப்பாணம் மேல் நீதிமன்றால் கடும் நிபந்தனையுடனான பிணையில் விடுவிக்கப்பட்டனர்.

ஊர்காவற்றுறை நீதிவான் நீதிமன்றில் டானியல் ரெக்சியன் கொலை தொடர்பில் சுருக்கமுறையற்ற விசாரணைகள் இடம்பெற்று வரும் நிலையில் சந்தேகநபர்கள் இருவருக்கும் எதிராக சட்ட மா அதிபர் தனக்குள்ள அதிகாரத்தின் கீழ் யாழ்ப்பாணம் மேல் நீதிமன்றில் நேரடியாக குற்றப்பத்திரிகை தாக்கல் செய்துள்ளார்.

யாழ் மேல் நீதிமன்றத்தில் விரைவில் இந்த வழக்கு விசாரணைக்கு வருமென தெரிகிறது.

எனது கணவருக்கும் லக்‌ஷ்மன் கதிர்காமர் கொலைக்கும் எந்த சம்பந்தமும் இ​ல்லை.

Tuesday, June 25, 2019


செய்யாத தவறுக்கு சிறையில் இருப்பதை நினைத்தே அவரது உடல்நிலை மோசமடைந்தது என தெரிவித்த, உயிரிழந்த அரசியல் கைதியான சகாதேவனின் மனைவி, விடுதலையாகுவேன் என்ற நம்பிக்கையில் இருந்தவர் இன்று விடுதலையாகாமலே எம்மை விட்டு சென்றுவிட்டார் என கதறுகிறார் 

முன்னாள் வெளிவிவகார அமைச்சர் லக்‌ஷ்மன் கதிர்காமர் கொலை வழக்கில் கைதுசெய்யப்பட்ட சிறைவைக்கப்பட்டிருந்த முத்தையா சகாதேவனின் மனைவி மேலும் தெரிவிக்கையில் 

நாங்கள் பதுளையைச் சேர்ந்தவர்கள். 1983 கலவரத்துக்குப் பின்னர்தான் கொழும்புக்கு வந்தோம். அப்படியே இங்கேயே இருந்துவிட்டோம். எங்கள் வாழ்க்கை சந்தோசமாகத்தான் இருந்தது. 

என்ன நடந்ததோ தெரியாது, எந்தக் குற்றமும் செய்யாத எனது கணவருக்கு இந்த நிலைமை ஏற்பட்டுள்ளது.வீடு, தோட்டங்களைத் துப்பரவு செய்வதற்காக எனது கணவரை அழைப்பார்கள். அவ்வாறானதொரு வேலைக்குத்தான் அன்றும் அவர் சென்றிருந்தார். வீட்டு உரிமையாளர் பணித்த தோட்ட வேலையை செய்திருக்கிறார். தோட்டத்தைச் சுத்தம் செய்ததோடு மதில் சுவரோடு இருந்த மரக்கிளைகளையும் வெட்டியுள்ளார். அதுவே கைதுக்குக் காரணமாக அமையும் என்று அப்போது அவர் அறிந்திருக்கவில்லை.

அவர் துப்பரவு செய்த தோட்டத்தின் அடுத்த வீட்டில்தான் லக்‌ஷ்மன் கதிர்காமர் இருந்திருக்கிறார். அங்குவைத்துதான் அவர் கொலை செய்யப்பட்டிருக்கிறார். அவர் கொலைசெய்யப்பட்டதோடு எனது கணவருக்கு தொடர்புள்ளது என  கூறி 2005ஆம் ஆண்டு எனது கணவரைக் கைதுசெய்தார்கள். 2008ஆம் ஆண்டுதான் வழக்குப் பதிவுசெய்தார்கள். 

இன்றுவரை வழக்குக்குப் போய் வருகிறேன். எதிர்வரும் 27ஆம் திகதியும் வழக்கு இருக்கிறது. இருந்த நகைகளை விற்று, கடன்வாங்கித்தான் வழக்குக்குப் போய் வந்தேன். எப்படியும் நான் வெளியில் வந்துவிடுவேன் என்று அவர் அடிக்கடி கூறிக்கொண்டிருப்பார். இந்த வழக்கில் கைதுசெய்யப்பட்ட இன்னுமொருவர் 6 மாதங்களுக்கு முன்னர் விடுதலை செய்யப்பட்டார். எல்லோரும் விடுதலை செய்யப்படுகிறார்கள், எந்த குற்றமும் செய்யாத என்னை மட்டும் ஏன் சிறையில் வைத்திருக்கிறார்கள் என்று மனமுடைந்து காணப்பட்டார். 62 வயதான என் கணவருக்கு இரண்டு வருடங்களுக்கு முன்பே சிறுநீரகமொன்று செயலிழந்திருக்கிறது. அதன் பின்னரே அவர் மோசமாக நோய்வாய்ப்பட்டார்.

நீரிழிவு நோயும் இருந்ததால் அதற்கும் மருத்துவம் செய்துகொண்டுதான் இருந்தார். இறுதியில் மற்றைய சிறுநீரகமும் செயல்பாட்டை இழக்கத் தொடங்கியுள்ளது. இத்தனைக்கும் சிறைச்சாலை வைத்தியசாலையில்தான் சிகிச்சைப் பெற்றுவந்தார். இரண்டு சிறுநீரகங்களும் செயலிழந்த நிலையில்தான் கொழும்பு தேசிய வைத்தியசாலையில் ஒரு மாதகாலமாக சிகிச்சைப் பெற்றுவந்தார். இந்த நிலையில் தான் அவர் எங்களை விட்டு சென்றுவிட்டார் என கண்ணீருடன் கூறினார் 

.

மேல்மாகாணம் ஹொரணை வலயத்தில் கடமையாற்றும் யாழ் ஆசிரியருக்கு “கவுத” எனக்கேட்டு கோடாரி தாக்குதல்!

Tuesday, June 25, 2019


யாழ்ப்பாணம் தெல்லிப்பளையில் வசிக்கும் விக்கினேஸ்வரன் செந்தூரன் மேல்மாகாணம் ஹொரணை வலயத்தில் குடாகங்க தமிழ் வித்தியாலயத்தில்  ஆசிரியராக கடமையாற்றிய வருகிறார். அவர் கடந்த ஞாயிற்றுக்கிழமை(23.6 2019) பிற்பகல் 6. 30 மணியளவில் குடாகங்க தோட்டத்தில் இருந்து தென்னேன பகுதியில் உள்ள கடைக்கு குடாகங்க ஊரைச் சேர்ந்த ஒருவருடன் மோட்டர் சைக்கிளில் சென்று கொண்டு இருக்கும் போது இடையில் வழி மறித்த சிங்கள பெரும்பான்மை இனத்தை சேர்ந்த ஒருவர் வழி மறித்து "கவுத " என்று கேட்டுள்ளார். அதற்கு அவர் ஒருசிரியர் குடாகங்க வித்தியாலயத்தில் படிப்பிக்கிறார் என்று கூறியுள்ளார். மேலும் அவர் "கம மொக்கத " என்று கேட்டுள்ளார். அவர் தான் யாழ்ப்பாணம் என்று கூறியுள்ளார். அதற்கு அந்த சிங்களவர் "யாப்பணய சேரட்ட மே    மொக்கடதே ஆவே "என்று கேட்டு கோடாரியினால் இரு தடவைகள் முதுகில் தாக்கி உள்ளார். மேலும் "யாப்பணய தெமலு "  என்று கூறி அடிக்க துரத்தி உள்ளார். ஆசிரியர் சத்தம் இட்டதும் அயலவர்கள் ஓடிவந்து மறித்து. களுத்துறை பிம்புர வைத்திய சாலைக்கு அழைத்து சென்றுள்ளனர். பின்னர்  அங்கிருந்து களுத்துறை நாகொட  வைத்திய சாலைக்கு மாற்றப்பட்டுள்ளார். குடாகங்க தோட்டத்தில் உள்ள மக்கள்  அகலத்தை பொலிஸில் முறைப்பாடு செய்ததையிட்டு சம்மந்தப்பட்ட சிங்களவர் கைது செய்யப்பட்டுள்ளார்.
மேற்படி சம்பவம் குறித்து பொலிஸார் விசாரணை நடத்தி வருகிறார்கள் என்று குடாகங்க மக்கள்கூறியுள்ளார்கள்.
செய்தியை பகிர்வோம்....உரியவருக்கு நீதி கிடைக்கும் வரை..

சிரித்துக் கொண்டு செருக்களம் புகுர முடியும் ஆனால் சிரித்துக்கொண்டு மரணத்தை முத்தமிட முடியுமா?

Tuesday, June 25, 2019


“சிரித்துக் கொண்டு வாடா தமிழா செருக்களம் புகுர” என்று தமிழர் விடுதலைக்கூட்டணி தலைவர்கள் 1977களில் மேடைகளில் பேசுவதுண்டு.

ஆனால் இவ்வாறு அழைத்த எந்த தலைவர்களும் களம் புகுரவில்லை. அதுமட்டுமல்ல தங்கள் பிள்ளைகளையும் களத்திற்கு அனுப்பவில்லை.

சரி அதை விடுவம். அதைக் கதைப்பதில் இப்ப எந்த பயனும் இல்லை. ஆனால் களம் புகுந்த இளைஞர்கள் சிரித்துக் கொண்டே புகுந்தனர் என்பதில் ஜயம் இல்லை.

அதேவேளை, சிரித்துக்கொண்டே மரணத்தை முத்தமிட முடியுமா என்று நான் சந்தேகப்பட்டது உண்டு.

போராடிக் கொண்டிருக்கும்போது இறப்பது வேறு. ஆனால் இறப்பதற்கென்றே போராட செல்வது வேறு. அதுவும் சிரித்துக் கொண்டே செல்வது இன்னும் வேறுவிதமானது.

அதுவும் எமது காலத்தில் எம் கண் முன்னால் அந்த அதிசயத்தை எமது இளைஞர்கள் செய்து காட்டியுள்ளார்கள் என்பதை அறியும்போது பெரிமிதமாக இருக்கிறது.

இதோ போர்க் என்ற இளைஞரை பாருங்கள். இன்று அவரின் நினைவு நாள் ஆகும். 

மாங்குளம் ராணுவமுகாமை தாக்குவதற்கு வெடிமருந்து நிரப்பிய வாகனத்தை சிரித்த முகத்துடன் அவர் விடைபெற்று செல்வதைப் பாருங்கள்.

இன்னும் சில நிமிடங்களில் அவர் மரணமடையப் போகிறார் என்பது அவருக்கு நன்கு தெரியும்.

இந்த இறுதி நிமிடங்களில் அவரின் பெற்ற தாயின் முகம் நினைவுக்கு வந்திருக்கும்.

அவரது சகோதரர்களின் நினைவுகள்கூட வந்திருக்கும். அவர் பிறந்து வளர்ந்த மண் நினைவுக்கு வந்திருக்கும்.

இத்தனையும் தாண்டி அவரால் எப்படி சிரித்த முகத்துடன் சென்று மரணத்தை முத்தமிட முடிந்தது?

பெண்களை கர்ப்பமாக்கி தற்கொலைதாரிகளாக அனுப்புகிறார்கள் என்று மணி ரத்தினம் படம் எடுத்தார்.

போதை மருந்து கொடுத்து தற்கொலைதாரிகளை அனுப்புகிறார்கள் என்று இலங்கை அரசு பிரச்சாரம் செய்தது.

போராட சென்றவர்களை பலவந்தமாக தற்கொலைதாரிகளாக மாற்றுகிறார்கள் என்று இந்திய அரசு கூறியது.

ஆனால் இதெல்லாம் தவறான, பொய் பிரச்சாரம் என்பதை நிரூபிக்கும் பல சாட்சியங்கள் வெளிவந்து கொண்டிருக்கின்றன.

எதிர்காலத்தில் வரலாறு இவர்களை எப்படி அடையளப் படுத்தப் போகின்றது என்று தெரியவில்லை.

ஆனால், சிரித்தக்கொண்டே மரணத்தை முத்தமிட முடியும் என்பதை நிரூபித்த  இவர்களது தியாகம் எந்தவித சந்தேகத்திற்கும் அப்பாற்பட்டது. அற்புதமானது.

இந்த வாரத்தில் நிறைவேற்றப்படும் என வெளியானது தகவல்? அச்சத்தில் உறைந்துள்ள சர்வதேச மன்னிப்பு சபை!

Tuesday, June 25, 2019


தேசிய போதைப் பொருள் ஒழிப்புவாரமான இவ்வாரத்தில் மரணதண்டனையை நிறைவேற்வதற்கான இரகசியமான நடவடிக்கைகள் இடம்பெறுகின்றன என தென்னிலங்கை ஊடகங்களில் செய்தி வெளியாகியுள்ள தகவல்கள் குறித்து அச்சமடைந்துள்ளதாக சர்வதேச மன்னிப்புச்சபை தெரிவித்துள்ளது.

போதைப் பொருள் தொடர்பான குற்றங்களிற்காக மரணதண்டனை விதிக்கப்பட்டுள்ள 13 பேருக்கும் மரணதண்டனையை நிறைவேற்றும் திட்டத்தை இலங்கை ஜனாதிபதி மைத்திரிபால சிறிசேன மரண தண்டனைச் சட்டம் அமுலுக்கு வரும் என அறிவித்திருந்த போது அதனை  உடனடியாக நிறுத்தவேண்டுமென சர்வதேச மன்னிப்புச்சபை வேண்டுகோள் விடுத்திருந்ததும் குறிப்பிடத்தக்கது.

இருப்பினும் மைத்திரி தான் மரண தண்டனையை நிறைவேற்றியே தீரவேன் என சூளுரைத்திருந்தார். இந்த வாரம் போதைப் பொருள் ஒழிப்பு வாரம் என்பதால் இவ்வாரம் இலங்கை ஜனாதிபதி மரணதண்டனையை நிறைவேற்றும் நோக்கத்துடன் உள்ளார் என எங்களிற்கு தகவல்கள் கிடைத்துள்ளன என சர்வதேச மன்னிப்புச்சபை தெரிவித்துள்ளது.அவ்வாறு மரணதண்டனை நிறைவேற்றப்பட்டால் 1976ம் ஆண்டின் பின்னர் மரணதண்டனை நிறைவேற்றப்படும் முதல் தடவையாக அது காணப்படும் என சர்வதேச மன்னிப்புச்சபை சுட்டிக்காட்டியுள்ளது.

மரணதண்டனை குறித்த தனது சாதகமான வரலாற்றை இலங்கை கைவிடப்போகின்றது என வெளியாகும் அறிக்கைகளால் நாங்கள் ஏமாற்றமடைந்துள்ளோம் என சர்வதேச மன்னிப்புச்சபையின் தென்னாசியாவிற்கான இயக்குநர் பிராஜ் பட்நாயக் தெரிவித்துள்ளார்.

மரணதண்டனையை நிறைவேற்றுவதன் மூலம் போதைப் பொருள் தொடர்பான குற்றங்களை கட்டுப்படுத்த முடியாது என குறிப்பிட்டுள்ள அவர், மரணதண்டனை நிறைவேற்றப்படுவது மனித உயிர்களை பாதுகாப்பது முக்கியமானது என கருதப்படும் மனிதாபிமான சமூகத்தை கட்டியெழுப்புவதில் ஏற்பட்டுள்ள தோல்வியையே புலப்படுத்தும் எனவும் தெரிவித்துள்ளார்.

மேலும் பழிவாங்கும் நோக்கில் மரணங்கள் இடம்பெறுவது இலங்கைக்கு தற்போது தேவையற்ற விடயம் எனவும் அவர் தெரிவித்துள்ளார்.

பயங்கரவாத தாக்குதலின் பின்னர் கைது செய்யப்பட்டவர்கள் குறித்து பிரதமர் கருத்து

Tuesday, June 25, 2019


கடந்த ஏப்ரல் 21 பயங்கரவாத தாக்குதல் சம்பவத்துடன் தொடர்புடைய, உயிருடன் இருக்கக் கூடிய சகலரும் பாதுகாப்புத் தரப்பினரின் பிடியில் இருப்பதாக பிரதமர் ரணில் விக்ரமசிங்க தெரிவித்தார்.

கொழும்பில் இன்று (25) நடைபெற்ற நிகழ்வொன்றில் கலந்துகொண்டு உரையாற்றுகையிலேயே பிரதமர் இதனைக் கூறினார்.

இவ்வாறு கைது செய்யப்பட்டுள்ளவர்களிடம் விசாரணைகள் முன்னெடுக்கப்பட்டு வருகின்றன. எந்தவித குற்றச் செயல்களுடனும் சம்பந்தப்படாதவர்களும் அவர்களிடையே உள்ளனர்.

அவர்களில் விடுதலை செய்ய முடியுமானவர்களை விடுதலை செய்யுமாறும், பிணையில் செல்ல முடியுமானவர்களை பிணையில் விடுவிக்குமாறும், வெவ்வேறு குற்றச் செயல்களுடன் அல்லது சட்ட விரோத குற்றச் செயல்களுடன் தொடர்புபட்டவர்கள் இருப்பதாயின், அது தொடர்பில் வழக்குகளைத் தாக்கல் செய்யுமாறும் நாம் சட்ட மா அதிபரிடம் தெளிவாக கூறியுள்ளோம்.

இதுதான் செய்ய வேண்டியுள்ளது. இதுவல்லாது வேறு எதுவும் செய்யப்பட வேண்டியதில்லையெனவும் பிரதமர் மேலும் குறிப்பிட்டார்.

கள்ளக்காதலியை கொன்ற ஏறாவூர் முன்னாள் பிரதேச செயலாளரிற்கு நீதிபதி இளஞ்செழியன் கொடுத்த தண்டனை!

Tuesday, June 25, 2019


2006 ஓகஸ்ட் மாதம் 31ம் திகதி ஜெயச்சந்திரா ஜெயந்தா என்பவருக்கு மரணத்தை விளைவித்த குற்றச்சாட்டில் சட்டமா அதிபர் திணைக்களத்தினால் 2018 ஜூன் மாதம் 11ம் திகதி குற்றப் பத்திரம்மொன்று மேல் நீதிமன்றத்தில் தாக்கல் செய்யப்பட்டிருந்தது.

வழக்கு இன்றைய தினம் விசாரணைக்கு எடுத்துக் கொள்ளப்பட்ட போது சதக்கத்துல்லாஹ் ஹில்மிக்கு எதிராக வழங்கப்பட்ட சாட்சியங்களின் பிரகாரம் கொலைகுற்றச்சாட்டினை புரிந்துள்ளார் என்ற குற்றம் நிரூபிக்கப்பட்டுள்ளதாக நீதிபதி தீர்ப்பளித்தார்.

பத்து வருட கடூழிய சிறை தண்டனையும், பத்தாயிரம் ரூபா தண்டப்பணம் செலுத்துமாறும், அதனை செலுத்த தவறும் பட்சத்தில் மூன்று மாத கால கடூழிய சிறை தண்டனை வழங்குமாறும் நீதிபதி கட்டளையிட்டார்.

மேலும் உயிரிழந்த பெண்ணின் மகனுக்கு ஒரு இலட்சம் ரூபா நஷ்ட ஈடு வழங்குமாறும் அதனை வழங்காவிட்டால் ஒரு வருட கால கடூழிய சிறைத் தண்டனை விதிக்குமாறும் தீர்ப்பளிக்கப்பட்டுள்ளது.

சதக்கத்துல்லாஹ் ஹில்மி திருகோணமலை பிராந்திய சுகாதார பணிமனையின் உதவி பணிப்பாளராக கடமையாற்றி கொண்டிருந்த வேளையில் உயிரிழந்த பெண்ணும் அதே அலுவலகத்தில் கடமையாற்றி கொண்டிருந்ததாகவும், அவர்களுக்கு இடையில் காதல் தொடர்பு ஏற்பட்டு அந்த காதல் தொடர்பினால் ஏற்பட்ட வாக்குவாதத்தின் காரணமாக மரணம் ஏற்பட்டுள்ளதாகவும் தெரியவந்துள்ளது.

பின்னர் அவர் ஏறாவூர் பிரதேச செயலராக கடமையாற்றியபோது, கடமையிலிருந்து விலக்கப்பட்டு நீதிமன்ற விசாரணையை எதிர்கொண்டார்.

(5 இலட்சம் பணம் கேட்டார்கள்; கொடுக்காததால் நீக்கினார்கள்: ஆனந்தசங்கரி மீது அடுக்கடுக்காக குற்றம்சுமத்தும் நீக்கப்பட்ட உறுப்பினர்கள்!

Tuesday, June 25, 2019


“தமிழர் விடுதலைக்கூட்டணியின் கொள்கை பரப்பு செயலாளர் சங்கையா எங்களை தொடர்பு கொண்டு 5 இலட்சம் ரூபா கேட்டார். நாம் இல்லையென்றோம். அதனால்தான் எங்களை கட்சியை விட்டு நீக்கியுள்ளனர்“ என பரபரப்பு குற்றச்சாட்டு சுமத்தியுள்ளனர், தமிழர் விடுதலை கூட்டணியிலிருந்து நீக்கப்பட்டுள்ள கல்முனை பிரதி மேயர் காத்தமுத்து கணேஸ் மற்றும் சுமித்ரா ஜெகதீசன் ஆகியோர்.

இன்று அவர்கள் செய்தியாளர்களை சந்தித்து இந்த பரபரப்பு குற்றச்சாட்டுக்களை சுமத்தினர்.

இது தொடர்பில் காத்தமுத்து கணேஸ் தெரிவிக்கும்பொது,

கல்முனையில் 41 வருடங்களின் பின்னர் நான்தான் பிரதி மேயராக தெரிவாகினேன். இது எனக்கல்ல, தமிழ் மக்களின் வெற்றி.

கடந்த உள்ளூராட்சி மன்ற தேர்தலிற்கு முன்பு எனது சொந்தப்பணத்தில் கட்சி செயலாளரை இங்கு வரவழைத்து, சொந்த பணத்தில் மேடையமைத்து, அவரை பேச வைத்தேன்.

எனக்கும் கட்சிக்குமிடையில் எந்த பிரச்சனையுமில்லை. இப்பொழுது சிலரது கதையை கேட்டு எங்களை கட்சியை விட்டு நீக்கியிருக்கிறார். கல்முனை பிரச்சனை வந்ததன் பின்னர், நாங்கள் முஸ்லிம்களுடன் நெருக்கமாக இருக்கிறோம் என சொல்லியுள்ளனர்.

கட்சியின் கொள்கை பரப்பு செயலாளர் சங்கையா, என்னிடமும், பதவி நீக்கப்பட்ட மற்ற உறுப்பினரிடமும் தலா 5 இலட்சம் ரூபா பணம் கேட்டார். அப்படி தர என்னிடம் பணம் இல்லை என்றேன். மீண்டும் தொலைபேசியில் கேட்டார். இல்லையென்றேன்.

கடந்தமாதம் மட்டக்களப்பில் தங்கியிருந்த ஆனந்தசங்கரி, எங்களை அங்கு வரச்சொன்னார். எங்களை மாகாணசபை தேர்தலில் போட்டியிட கேட்டார். நாம் மறுத்தோம். பின்னர் துக்கமான செய்தியொன்றை சொல்லப் போவதாக கூறி, உள்ளூராட்சி உறுப்புரிமையிலிருந்து தானாக விலகும் கடிதத்தில் கையொப்பமிட கேட்டார். நான் மறுத்தேன். கைப்பையை எங்களை நோக்கி எறிந்தார். நாம் எழுந்து வந்து விட்டோம்.

இப்பொழுது எங்களை கட்சியிலிருந்து நீக்குவதாக அறிக்கை விட்டுள்ளார். அவர் ஒரு பெரிய தலைவர். இதுவரை நினைத்திருந்தேன், அவர் தமிழர்களிற்காக உழைக்கிறார் என. ஆனால், அவர் துரோகம் செய்கிறார் என்பது இப்பொழுதுதான் தெரிந்தது“ என்றார்.

அபாயா விவகாரம்: ஜனாதிபதி, பிரதமருக்கு ரிஷாத் பதியுதீன் கடிதம்

Tuesday, June 25, 2019


உள்நாட்டலுவல்கள் அமைச்சு கடந்த மே மாதம் 29ஆம் திகதி வெளியிட்ட அரசாங்க ஊழியர்களின் ஆடை தொடர்பான சுற்று நிருபத்தை, மீண்டும் திருத்தி வெளியிடுவதில் காலம் தாழ்த்தப்படுவதால் முஸ்லிம் பெண்கள் அலுவலகங்களுக்குச் செல்வதில் பெரும் சிரமங்களை எதிர்கொள்வது தொடர்பில் அகில இலங்கை மக்கள் காங்கிரஸ் தலைவரும் முன்னாள் அமைச்சருமான ரிஷாத் பதியுதீன், ஜனாதிபதி மைதிரிபால சிரிசேன, பிரதமர் ரணில் விகரமசிங்க மற்றும் அமைச்சர் ரஞ்சித் மத்தும பண்டாரவின் கவனத்திற்கு கொண்டு வந்துள்ளார்.

இச்சிக்கலைத் தீர்த்து வைக்க முகத்தைத் திறந்து முஸ்லிம்களின் கலாச்சார உடையில் அபாயா அணிவதையும் அனுமதித்து புதிய சுற்று நிருபத்தை விரைவில் வெளியிடுமாறும் பாராளுமன்ற உறுப்பினர் ரிஷாத் பதியுதீன் கடிதமொன்றை தனித்தனியாக இவர்களுக்கு அனுப்பிவைத்துள்ளார்.

அக்கடிதத்தில் அவர் மேலும் தெரிவித்துள்ளதாவது:
உள்நாட்டலுவல்கள் அமைச்சினால் அண்மையில் வெளியிடப்பட்ட அரச ஊழியர்களின் ஆடை தொடர்பிலான சுற்று நிருபத்தில் முஸ்லிம் பெண்கள் பாரம்பரியமாக அணிந்து வந்த அபாயாவுக்கு தடை விதிக்கப்பட்டிருந்தது. இதனால் அலுவலகங்களுக்குச் செல்வதில் முஸ்லிம் பெண்கள் பெரும் மன உளைச்சலுக்கு உள்ளாகினர். தேசிய உடை என்ற போர்வையில் பாரம்பரிய முஸ்லிம்களின் கலாச்சார ஆடைகள் மீது கட்டுப்பாடு விதிப்பதும், இஸ்லாமிய கலாச்சார விடயங்களில் தேவையற்ற நெருக்குதல்களை ஏற்படுத்துவதும் சமூகங்களுக்கிடையில் வீண் விமர்சனங்களை ஏற்படுத்துவதாகவுள்ளது.

இனங்களை மோதவிட்டு சுய இலாபங்களையும் அரசியல் முதலீடுகளையும் அதிகரிக்கக் காத்திருக்கும் இனவாதிகளும் அண்மையில் வெளியிடப்பட்ட சுற்று நிருபத்தை ஒரு இனத்தின் மீதான ஒடுக்கு முறையாகப் பயன்படுத்த முயல்கின்றனர்.

இவ்விபரீதங்களைக் கருத்தில் கொண்டு கலாச்சாரங்களின் நம்பிக்கைகளில் தேவையில்லாத தலையீடுகளைத் தவிர்க்கும் வகையில் புதிய சுற்று நிருபத்தை அவசரமாக வெளியிட வேண்டும்.

மேலும், பாரம்பரியமாக இலங்கை முஸ்லிம் பெண்கள் அணிந்து வந்த அபாயாவையும் அனுமதித்து புதிய சுற்று நிருபத்தை வெளியிடுவது சிறப்பாக அமையும். ஏற்கனவே வெளியிடப்பட்ட சுற்று நிருபத்தால் சில அரச அதிகாரிகளினால், அலுவலகங்களிலும், பாடசாலைகளிலும், பல்கலைக்கழகங்களிலும் முஸ்லிம் பெண்கள் தேவையற்ற நெருக்கடிகளை எதிர் கொள்ள நேர்ந்தது. இதைத் தவிர்க்கும் பொருட்டு ஆடைகள் தொடர்பில் தெளிவான வரையறைகளை உள்ளடக்கி புதிய சுற்று நிருபத்தை வெளியிட வேண்டும் என்றும் பாராளுமன்ற உறுப்பினரும் அகில இலங்கை மக்கள் காங்கிரஸ் தலைவருமான ரிஷாத் பதியுதீன் தனது கடிதத்தில் தெரிவித்துள்ளார்

முஸ்லிம் அடிப்படைவாதத்தை இல்லாதொழிக்க வேண்டும் – அனைவரும் கண்டிக்கு வாருங்கள் – BBS

Tuesday, June 25, 2019


நாட்டில் தற்போது முஸ்லிம் அடிப்படைவாதப் பிரச்சினை மிகவும் முக்கியமானதாக மாறியிருப்பதாகவும், அதனைத் இல்லாதொழிக்க பரந்த வேலைத்திட்டம் ஒன்று அவசியம் எனவும் தெரிவித்துள்ள பொதுபலசேனா அமைப்பின் பொதுச்செயலாளர் கலகொட அத்தே ஞானசார தேரர், இவை தொடர்பில் பகிரங்கமாகக் கலந்துரையாடுவதற்கும், யோசனைகளை முன்வைப்பதற்கும் அனைவரையும் கண்டிக்கு வருமாறு அழைப்பு விடுத்துள்ளார்.

நாட்டில் தோன்றியுள்ள அடிப்படைவாதப் பிரச்சினையை முழுமையாக இல்லாதொழிப்பது குறித்து ஆராய்தல், யோசனைகளை முன்வைத்தல் என்பவற்றை நோக்காகக் கொண்டு பௌத்த தேரர்கள், பொதுமக்கள் அனைவரையும் இணைத்துக்கொண்டு எதிர்வரும் ஜுலை மாதம் 7 ஆம் திகதி பிற்பகல் 2 மணிக்கு கண்டியில் மாநாடு ஒன்றை நடத்துவதற்கு பொதுபலசேனா அமைப்பு திட்டமிட்டுள்ளது.

இதுகுறித்து விளக்கமளிக்கும் வகையில் இன்று பொதுபலசேனா அமைப்பின் காரியாலயத்தில் ஏற்பாடு செய்யப்பட்டிருந்த ஊடகவியலாளர் சந்திப்பிலேயே அவர் இவ்வாறு தெரிவித்தார்.

அதேவேளை முஸ்லிம் அடிப்படைவாதப் பிரச்சினை முழுமையாகக் களைவதற்கு பாரம்பரிய முஸ்லிம்கள் உட்பட சமூகத்தின் அனைத்துத் தரப்பினரும் ஒன்றிணைய வேண்டும் எனவும் அவர் கோரிக்கை விடுத்துள்ளார்.